დასვენების დრო არ არის. გამომდინარე იქედან, რომ „რეალს“ „ვილიარეალთან“ დაპირისპირება ხუთშაბათს უწევს, ზინედინ ზიდანმა გუნდი დღეს შეკრიბა და მზადება დაიწყო.

ფეხბურთელები, რომლებიც „გრანადასთან“ სასტარტოში იყვნენ, დღეს შედარებით ნაკლებად დაიტვირთნენ, დანარჩენებმა კი მთავარი მწვრთნელისა და ფიზ.მომზადების სპეციალისტის, გრეგორი დიუპონის ყველა დავალება შეასრულეს.

სესია მკაცრი სანიტარული ნორმებისა და პროტოკოლის წესის დაცვით წარიმართა.

ვარჯიშზე დიდი ყურადღება დაეთმო ტაქტიკურ მონახაზებს, კარში დარტყმების კომპონენტს, ბურთის ფლობასა და პრესინგს.

გუნდთან ერთად ემზადებოდა ლუკა იოვიჩი, რომელმაც კორონავირუსზე მესამე ტესტიც წარმატებით ჩააბარა და კოლექტივში დაბრუნების ნებართვა მიიღო.

მეკარეებს გოლკიპერთა მწრთნელი ავარჯიშებდა, შემდეგ კი ყველა გაერთიანდა.

მომდევნო სესია ხვალ შედგება, ზეგ კი „ბლანკოსი“ საჩემპიონო მატჩს ითამაშებს. მოგეხსენებათ, „ვილიარეალთან“ მოგების შემთხვევაში ლა ლიგის ტიტულს ტურნირის დასრულებამდე 1 ტურით ადრე გაინაღდებს.