მადრიდის "რეალი" რიგით 81–ე "პრიმერას" სეზონს ატარებს. "მერენგებმა" უკვე 17 ტური დაასრულეს და 61(!) გოლიც გაიტანეს. ისიც უნდა აღინიშნოს, რომ ამ 17 მატჩიდან "რეალს" ორში გოლი საერთოდ არ გაუტანია. საერთო ჯამში, "მერენგებს" საშუალოდ მატჩში 3.58 გოლი გააქვთ. 17–დან 10 შეხვედრაში "ბლანკოსებმა" 4 და 4–ზე მეტი გოლის გატანა შეძლეს.

მადრიდის "რეალისთვის" ეს საუკეთესო სტარტი აღმოჩნდა არსებობის ისტორიაში. აქამდე "რეალს" ამდენი გოლი არასდროს ჰქონდა გატანილი, საუბარია პირველ წრეზე. ცხადია, "მერენგებს" კიდევ შეუძლიათ გოლების რაოდენობის გაზრდა, რამეთუ პირველი წრის დასრულებამდე მათ კიდევ ორი მატჩი აშორებთ.

აქამდე საუკეთესო შედაგად 1950–1951 და 1960–1961 წლების სეზონი ითვლებოდა. ორივე შემთხვევაში "თეთრებმა" 53–53 გოლის გატანა მოახერხეს.

რაც შეეხება გუნდის მეგოლეებს, გოლის გატანა თორმეტმა ფეხბურთელმა შეძლო. საუკეთესო კრიშტიანო რონალდო გახლავთ 21 გატანილი ბურთით. შემდეგ მოდიან: იგუაინი(13), ბენზემა(10), დი მარია(4), კაკა(3), კალეხონი(2), რამოს(2), მარსელო(2), ალონსო(1), პეპე(1), ვარანი(1) და ალტინტოპი(1).