მადრიდის "რეალმა" ,14 სექტემბერს, ჩემპიონთა ლიგის ეგიდით ჯგუფური ეტაპის პირველი შეხვედრა ზაგრების "დინამოს" წინააღმდეგ ჩაატარა და მოკრძალებული ანგარიშით 0-1 იმარჯვა. მატჩი ხორვატიაში გაიმართა.

მადრიდის "რეალმა" ჩემპიონთა ლიგის ჯგუფური ეტაპის პირველ შეხვედრაში ზაგრების "დინამოს" წინააღმდეგ ითამაშა და მეტოქე მინიმალური ანგარიშით 0-1 დაამარცხა. აღსანიშნავია ის ფაქტი, რომ ესპანელებმა მატჩი 10 ფეხბურთელით დაასრულეს.

გასულ მატჩს "თეთრების" მთავარი მწვრთნელი ჟოზე მოურინიო ტრიბუნიდან ადევნებდა თვალს, მისი პოსტი კი დროებით, პორტუგალიელის თანაშემწემ, აიტორ კარანკამ დაიკავა. მადრიდულ გუნდს გამარჯვება ანხელ დი მარიას გოლმა მოუტანა.

ესპანელ ფეხბურთელებს ზაგრებში თამაში ძალიან გაუჭირდათ, შეხვედრის მეორე ნახევარში კი მარსელოს მოედნიდან გაძევებამ, მადრიდელებს საქმე კიდევ უფრო გაურთულათ. ბრაზილიელი მარცხენა მცველი შეხვედრის არბიტრმა სიმულაციისთვის გააძევა მოედნიდან.

"თეთრები" მატჩის საწყის ეტაპზე საკმაოდ კარგად გამოიყურებოდნენ, მე-11 წუთზე კარიმ ბენზემამ დი მარიას პასით ისარგებლა და მეტოქის კარის მიმართულებით გადაგზავნა ბურთი, თუმცა უშედეგოდ.

ექვს წუთში თავად დი მარიამ ვერ გამოიყენა ბენზემას კარგი გადაცემა და ახლო მანძილიდან ვერ მოახერხა მეტოქის კარის აღება, საბოლოოდ მეკარის ფეხიდან ასხლეტილ ბურთთან ოზილი აღმოჩნდა, რომელმაც თანაგუნდელთა მსგავსად უხეიროდ მოიქნია ფეხი და ანგარიში უცვლელი დატოვა.

პირველი ნახევრის შუაში მარცხენა ფლანგიდან მარსელო მასპინძელთა საჯარიმოში შეიჭრა, ბრაზილიელმა ლეკო მოძრაობაზე დაიჭირა და ლამაზი მოძრაობით ჩამოიცილა იგი, შემდეგ კი სამხრეთ ამერიკელი "დინამოს" საჯარიმო მოედანში დაეცა... მადრიდის "რეალის" მარცხენა მცველი თერთმეტმეტრიანს ითხოვდა, თუმცა გამეორებაზე კარგად გამოჩნდა, რომ შეხვედრის არბიტრი შვეინ ოდვარ მოენი მართალი აღმოჩნდა, მარსელოსა და ლეკოს შორის არანაირი კონტაქტი არ ყოფილა, ბრაზილიელს უბრალოდ ფეხი დაუცდა და სწორედ ამიტომ აღმოჩნდა გაზონზე.

ტაიმის ბოლოს ლეკომ ფაბიო კოენტრაოს წინააღმდეგ ძალიან უხეშად ითამაშა და ყვითელი ბარათით დაისაჯა.

მატჩის მეორე ნახევარი მადრიდელებმა აქტიურად დაიწყეს. 53-ე წუთზე მეტოქის საჯარიმო მოედანთან ახლოს ბურთი კარიმ ბენზემამ მიიღო, მან ბურთი მარსელოს გადააწოდა, რომელმაც თავისმხრივ მარჯვენა ფლანგზე განაგრძო შეტევა, სადაც ანხელ დი მარია მოძრაობდა, მან კარგად მოიქნია მარცხენა ფეხი და ბურთი მეკარისგან მარჯვენა მაღალ კუთხეში გადაგზავნა. არგენტინელმა ფეხბურთელმა ანგარიში გახსნა 0-1.

54-ე წუთზე რონალდო დასარტყმელ პოზიციაზე აღმოჩნდა, თუმცა მას ამჯერად "დინამოელთა" კიპერმა, კელავამ აჯობა.

მარსელომ მეორე ნახევრის შუა ნაწილში კიდევ ერთხელ იაქტიურა, ბრაზილიელი ფეხბურთელი მეტოქის საჯარიმოში შეიჭრა, მოწინააღმდეგე კარგი მოძრაობით ჩამოიცილა და კიდევ ერთხელ აღმოჩნდა გაზონზე... ოდვარ მოენმა ამჯერადაც მარსელოს საწინააღმდეგო გადაწყვეტილება მიიღო, მან ბრაზილიელს მეორე ყვითელი ბარათი უჩვენა და მოედნიდან გააძევა.

მიუხედავად იმისა, რომ მადრიდელები ათი კაცით თამაშობდნენ, მათ კიდევ ერთი ძალიან სახიფათო მომენტი შექმნეს, დასარტყმელ პოზიციაზე ამჯერად კარიმ ბენზემა აღმოჩნდა, რომელსაც კელავამ კიდევ ერთხელ აჯობა.

მატჩის ვიდეო მიმოხილვა

სტატია მომზადებულია Soccernet და RealMadrid.Com-ზე დაყრდნობით.������� dle 10.1������� ������� ������